Psa 118 | MNA | STEP | O niom iwal, leleyom ambai pa Yooba mi kapakuri. Pa ni ambaiŋana kat. Ni ko itoto sua kini mbukŋana mi iurur leleene pa wal kini ma alok.

aMbo 56:4, 121:7; 2Tim 4:18; Ibr 13:4

b1Kor 15:57; 1Yo 5:4

c1Kor 11:32; Ibr 12:5

dMbo 15:1+, 24:3+; Tur 22:14

eMt 21:42; Mk 12:10+; Ŋgo 4:11; 1Pe 2:7

fPil 4:4

gLu 13:35, 19:38; Yo 12:13

Psalms 118

Mboe 118

Zin Israel ziŋan king kizin lelen ambai kat pa Merere

1 O niom iwal, leleyom ambai pa Yooba mi kapakuri. Pa ni ambaiŋana kat.
Ni ko itoto sua kini mbukŋana mi iurur leleene pa wal kini ma alok.
2 Niom iwal biibi ki Israel, koso ta kembei:
“Ni ko itoto sua kini mbukŋana mi iurur leleene pa wal kini ma alok.”
3 Mi niom patoronŋana koyom ta popoŋana ki Aron na tomini, koso ta kembei:
“Ni ko itoto sua kini mbukŋana mi iurur leleene pa wal kini ma alok.”
4 Tana niom wal ta komototo Yooba mi keleŋleŋ la kalŋaana na, niom ta boozomen koso ta kembei:
“Ni ko itoto sua kini mbukŋana mi iurur leleene pa wal kini ma alok.”

5 Nio ti, indeeŋe ta aŋbotmbot pataŋana leleene mi aŋru zoloŋ na, aŋtaŋroro Yooba be iuulu yo.
Mi ni ileŋ kalŋoŋ mi iur leŋ zaala, tabe aŋyooto pa pataŋana tana mi aŋbot mat.
6 Sombe Yooba ilae tio, na nio ko aŋmoto koroŋ sa som.
Pa tomtom len mburan iŋgoi be tipasaana yo? ^a
7 Iŋgi Yooba imbotmbot kolouŋana pio be iuulu yo.
Tana nio ko aŋre i ikoto koŋ koi bizin mi ikam yo ma aŋlip pizin. ^b
8 Iti tapase pizin tomtom pepe.
Tapase pa Yooba itutamen be iporoukaala iti, to ambai.
9 Mi zin bibip ta tikamam peeze i tomini, tapase pizin pepe.
Tapase pa Yooba itutamen be iporoukaala iti, to ambai.

10 Muŋgu zin karkari timar ma tiliukaala yo be tikam malmal pio.
Tamen nio aŋpase pa Yooba mburaana, tana aŋkas zin ma timap.
11 Timar pa lele boozomen, mi tiliukaala yo ma sik.
Tamen nio aŋpase pa Yooba mburaana, tana aŋkas zin ma timap.
12 Zin tiku yo ma sik kembei ta parambel.
Mi bil pa tamen mi mburan imap, mi tiko ma tila len, kembei ta you ikan mbutmbuutu gorokŋana.
Pa nio aŋpase pa Yooba zaana, tana aŋkas zin ma timap.
13 Zin timaŋga pio ma rimen mi tikoto yo.
Tamen Yooba iuulu yo.
14 Yooba ikamam leŋ mburoŋ mi iporoukalkaala yo.
Ni ulaaŋa tio ŋonoono.

15 Keleŋ la pa zin wal ndeeŋeŋan. Iŋga timbotmbot beeze kizin kizin, mi kalŋan izalla ma tiyotyooto. Pa Yooba ikamke iti kek.
Tizzo ta kembei: “Yooba namaana woono na, mburaanaŋana.
16 Namaana woono, ta ikam uraata biibi piam.
Yooba namaana woono na, mburaanaŋana kat!”
17 Uunu tina ta aŋmeete som, mi iŋgi aŋbot motoŋ yaryaara men,
bekena aŋsoyaara uraata bibip ki Yooba.
18 Ŋonoono, ni ibalis kat yo.
Tamen izem yo ma aŋmeete som. ^c
19 Tana kataama ta kizin wal ndeeŋeŋan i na, kakaaga zin pio.
Pa aŋsombe aŋlela mi aŋpet Yooba kereene uunu, mi aŋpakuri pa mbulu ta ni ikam pio na.

20 Iŋgi kataama ki Yooba
be zin wal kini ndeeŋeŋan tilela ma tipet kereene uunu. ^d

21 Yooba, nu leŋ tiŋiizi tio mi uulu yo.
Tana leleŋ ambai pu mi aŋpakuru.
22 Pat ta zin ruumu poŋana kan matan repiili mi tipiri lae lene na,
pat tamen tana ko iwe pat mataana kana be ruumu mbuleene ise. ^e
23 Mbulu tana ipet pa Anutu itunu mburaana.
Mi amre na, ipa ndel kat.
24 Aigule ambaiŋana ti, Yooba ikam piti.
Tana lelende ambai mi menmeen ti pa. ^f

25 O Yooba, muŋai yam mi kamke yam!
Kampe yam mi kam yam ma ambot ambai!

26 Yooba ko ipombol tomtom taiŋgi mi ikampe i. Pa ni ikam Yooba ruŋguunu ta imar i!
Tana niam ta ambot lela Yooba urum kini leleene na, amsuŋi be ipombol yom mi ikampe yom. ^g

27 Yooba, ni ta Anutu ŋonoono!
Ni iurur mat piti mi ikampewe iti.
Keteege ni runrun ila nomoyom, mi kala kapapiliu artaal mi kapakuri.

28 Nu ta Anutu tio. Nio leleŋ ambai pu mi aŋpakuru.
Nu ta Anutu tio. Nio ko aŋwit urum isala kor!

29 O niom iwal, leleyom ambai pa Yooba mi kapakuri. Pa ni ambaiŋana kat.
Ni ko itoto sua kini mbukŋana mi iurur leleene pa wal kini ma alok!